Wenn uns daaran liggt uns plattdütske Spraak to bewahren, denn hört de in Kinnermund, so menen wi dat van´t Börgervereen Hatshusen/Ayenwold un so steiht dat ok in uns Satzung ut dat Jahr 1988, as wi de Börgervereen in´t Leven ropen hebbt: Wi willn uns daarför insetten uns plattdütske Spraak an uns Kinner wiedertogeven.

Nu is dat neet so, dat bi uns in´t Dörp all Kinner van to Huus platt proten, wenn ok intüsken völ weer daarmit anfangen mit her Kinner platt to proten.

Daarmit avers ok de Kinner de plattdütske Spraak lehren, de van Huus her nich platt proten gifft dat völ Angebote van´t Börgervereen för uns Kinner. Wie hebbt:

en plattdütsken Kinnerchor un
uns plattdütske Kinnertheaterkoppel „Lüttje Bühn Hatshusen-Ayenwold“.

Bi beid Koppels maken jeweils ruugweg 15 Kinner in´t Oller tüsken 4 un 16 Jahr mit, wat för uns Dörp mit knapp 600 Inwohners heel bült sünd.

Wenn se denn 16 Jahr old sünd, könnt se mitmaken bi de groote Theaterspölers van´t „Theater Hatshusen-Ayenwold“ un wenn denn all paar Jahr mal en heel groot plattdütske Freeluchtspektakel spölt ward, denn sünd uns Kinner natürelk ok daarbi.

So versöken wi van´t Börgervereen düchtig wat för uns plattdütske Spraak to doon un för völ Kinner hier in uns Dörp is platt proten intüsken wat heel dageliks. Un dat markt man, denn wenn dat all 2 Jahr um dat plattdütske Vörlesen in´t Haupt- un Realschool Moormerland off in´t IGS Moormerland geiht, sünd immer völ Kinner ut Hatshusen-Ayenwold mit goode Erfolg daarbi.